▪️瑞士近九場世界盃分組賽取得五勝三和一負嘅成績，自從1994年4-1 擊敗羅馬尼亞之後，第一次喺一場世界盃比賽取得四個入波。加列沙卡（Granit Xhaka）喺2014、2018同2026年世界盃都取得入波。20歲零247日嘅文森比（Johan Manzambi）成為瑞士喺世界盃決賽周最年輕嘅梅開二度球員。瑞士都睇準時機，正當波斯尼亞壓前進攻，進攻投入兵力唔少之際，就換入文森比同魯賓華加斯（Rubén Vargas）改變進攻節奏同進攻嘅流動性，收到相當好嘅效果。文森比喺前場可以有好多功能同擔當唔同嘅角色，作為後備奇兵，效果理想。

波斯尼亞低位防守做得唔錯兼且配合接近五人嘅防線，加上大部份時間梅夏利莫域（Tarik Muharemovic）都表現出色，防守整體係可以嘅，但係當一壓前，後防空位多，危機就出現。

▪️拖莉賓嫊（Tori Penso）成為史上首位美國女性，擔任世界盃賽事嘅主球證，今場捷克對南非見到拖莉吹呢一場。助理裁判都係由女性做，成為今屆世界盃至今唯一一場全女班裁判組合。不過若論第一位女性做世界盃主裁判，其實係2022年卡塔爾世界盃，由法國嘅史蒂芬妮法柏特（Stephanie Frappart）吹哥斯達黎加對德國嘅比賽。

捷克早段有好多極具威脅嘅埋門，蘇積卡（Alexandr Sojka）助攻薩迪歷（Michal Sadílek）嘅入波都相當乖巧。不過球隊整體對機會嘅捕捉尤其係擺個波入網能力確實欠奉，包括柏迪舒希克（Patrik Schick）都錯失咗最少兩次黃金機會，呢個就為佢哋失分埋下伏筆。領隊高碧（Miroslav Koubek）喺換人調動上反而令球隊更保守同被動，最後一戰要力撼墨西哥搶分，難度都幾大。

雙方節奏比較慢，反而有利於南非可以保存體力下半場一搏。莫高拿（Teboho Mokoena）領黃牌末戰需要停賽，不過就射入十二碼先返去休息。蘇斯（Pavel Šulc）禁區內協防犯天條，南非攞番一分，同捷克一樣保留番一絲晉級希望。

▪️賽前預測卡塔爾「作客」有力一戰，結果就大出意料！卡塔爾左閘亞密特（Homam Ahmed）被逐後，下半場再有麥迪堡（Assim Madibo）踢斷伊斯美爾干尼（Ismael Kone）小腿而「直紅」，球隊本身毫無優勢情況下，長達20分鐘只能以9人迎戰兼吞下慘敗。卡塔爾喺收到第二張紅牌之後，有最少10分鐘球隊嘅球員心情似乎受到「事件」影響而唔係咁集中，防守都有點亂，幸好能夠調整番。後備入替嘅文拿爾（Mohamed Manai）救波失敗，都貢獻咗一球烏龍。

拿連（Cyle Larin）打開紀錄，取得BTB入波之外，個人亦都喺今屆賽事累積兩個入球，不過還未夠隊友莊拿芬達維（Jonathan David）威水，成為繼美斯之後今屆第二位上演帽子戲法嘅球員；而後備入替嘅沙利巴（Nathan-Dylan Saliba）都有一個相當靚嘅直接罰球入網。加拿大緊張發揮好好，球員都喺水平之上，尾場斗瑞士相信可以放鬆心態爭奪首名出線資格。

世界盃分組賽賽事賽果-Group A捷克🇨🇿1-1 🇿🇦南非墨西哥🇲🇽🆚🇰🇷南韓（比賽進行中）

Group B瑞士🇨🇭4-1 🇧🇦波斯尼亞加拿大🇨🇦6-0 🇶🇦卡塔爾

FIFA World Cup 2026 🇺🇸🇨🇦🇲🇽世界盃分組賽世界杯捷克球迷俱乐部南非瑞士球迷俱乐部波黑加拿大卡塔尔