▪️基利安麥巴比（Kylian Mbappé ）一記遠射，加一個靚嘅走位配合入波，梅開二度，累積世界盃決賽周入波去到14球。而佢喺法國國家隊嘅總入球數累積到58球，超越「銀河唯一」基奧特（Olivier Giroud）坐上頭把交椅。

下半場中段開始，法國嘅走位配合、位置互換同節奏加快，都令到塞內加爾無法適應。奧利斯（Michael Olise）幾下俾波都精彩；烏柏美簡奴（Dayot Upamecano）幾次防守嘅包抄同競爭都係好出色；觀廸（Jules Koundé）都有好幾次積極上前參與進攻，效果唔錯。

下半場塞內加爾中後場嘅失誤比較多，尤其係拉文尼卡馬拉（Lamine Camara）表現下滑得比較緊要。塞內加爾一對閘迪亞達（Krépin Diatta）同迪奧夫（El Hadji Malick Diouf）上半場嘅表現係出色嘅，壓迫、用波同上前嘅時機都做得好；36歲嘅古爾耶（Idrissa Gueye）成為塞內加爾歷來決賽周上陣最大年紀嘅球員；18歲零143日嘅麥比耶（Ibrahim Mbaye） 就成為塞內加爾歷來決賽周入波最年輕嘅球員。

▪️艾夫夏蘭特（Alf-Inge Haaland） 、科斯特維特（Erik Thorstvedt） 同索洛夫（Goran Sorloth） 1994年一齊踢世界盃，2026年佢哋三個嘅仔仔都一齊踢世界盃，可惜第四個入波嘅唔係基斯甸科斯特維特（Kristian Thorstvedt）。近幾日睇有啲球隊踢雙箭頭，進攻嘅侵略性同威脅度都幾好，挪威（雖然有時進攻都接近係433）、瑞典同伊拉克都係。

特別要讚賞一下伊拉克嘅攻勢以埋門作結嘅完成度幾高，球隊喺進攻三區嘅配合度唔錯，攻門嘅意識強。而最終伊拉克雖然只有 38% 控球，但係埋門次數只係少過挪威一次。

可能考慮到體力嘅流放同氣候狀況，挪威並冇好似喺自己主場咁做好多前場壓迫。佢哋後防應付高空波嘅配合同協調要認真檢討一下，個人覺得奧斯迪加（Leo Østigård）今季嘅狀態比希瑾（Torbjørn Heggem）好，更加值得踢正選。

▪️好多人以為美斯同幾位阿根廷隊友係過去MLS養老，豈知原來係過去提前熟悉場地氣候？！賽後都有唔少人大為驚嘆，39歲嘅阿根廷球王大演帽子戲法，世界盃總入球數字已經追和紀錄保持者- 德國射手高路斯（Miroslav Klose）嘅16球。美斯成為首位六屆世界盃都能夠登場嘅球員，佢喺5分鐘就窄角度射入，不過就越位在先被判詐糊，同樣情況亦都出現喺阿爾及利亞嘅查比（Fares Chaibi）身上，不過隨後喺17分鐘就開始成為阿根廷球王嘅表演時間。此外，包括迪保羅、利辛度馬天尼斯、安素費蘭迪斯、麥阿里士打都有相當唔錯嘅發揮，而一對閘嘅麥甸拿同蒙迪爾更加值得稱讚。

阿爾及利亞唔係完全挨打，但係有爸爸法國球王施丹觀戰嘅盧卡施丹（Luca Zidane）喺第二個失波「派膠」就要附上莫大嘅責任，呢個對球隊士氣嘅打擊亦都導致佢哋未有喺較後時間作出更好嘅回應。35歲嘅馬列斯下半場入替，表現一般。

▪️奧地利喺近10場世界盃決賽週賽事中先入球都保持不敗，取得9勝1和。

37歲嘅艾拿奧杜域後備入替表現唔係太理想嘅卡拉傑錫（Sasa Kalajdzic），成為改變球隊命運嘅最關鍵人物。下半場先有入球因普斯治（Stefan Posch）手球在先被判詐糊，繼而頭槌入波但最終計落折射嘅艾亞拉比（Yazan Al-Arab）烏龍之上。最後時刻佢射入十二碼，但係賽後全場最佳就俾咗對方入波嘅艾利奧雲（Ali Olwan），都真係幾無奈。

約旦嘅表現絕對值得掌聲，尤其係開賽早段就先入為主搶攻，俾到奧地利防線好大壓力。艾譚馬利（Mousa Al-Tamari）、法侯利（Odeh Fakhoury）、艾拉華比迪（Noor Al-Rawabdeh）以及艾利奧雲輪番施襲，最終由艾利奧雲攻入佢哋隊史第一粒世界盃入球。不過後防就有待提高，守門員阿卜拉拿（Yazeed Abulaila）最後時間「甩轆」嚇出唔少球迷冷汗。

世界盃分組賽賽事賽果-Group I法國🇫🇷3-1 🇸🇳塞內加爾伊拉克🇮🇶1-4 🇳🇴挪威

Group J阿根廷🇦🇷3-0 🇩🇿阿爾及利亞奧地利🇦🇹3-1 🇯🇴約旦

*附上I & J組積分榜排名

FIFA World Cup 2026 🇺🇸🇨🇦🇲🇽世界盃分組賽