戲劇泰斗鍾景輝離世 享年89歲 .香港戲劇界一代宗師鍾景輝（King Sir）今晨（3日）在家中睡夢中安詳離世，享年89歲。其姪兒鍾志權向傳媒發布消息，感謝各界一直以嚟嘅關心與陪伴，喪禮及追思安排將稍後公布。

King Sir畢生奉獻戲劇，桃李滿門，被譽為香港演藝界教父。佢最為人津津樂道嘅，莫過於對周潤發嘅知遇之恩。當年周潤發投考TVB藝員訓練班，面試初期因表現生澀幾乎被淘汰，擔任主考官嘅鍾景輝獨具慧眼，力排眾議投下關鍵一票，成就日後名震國際嘅影帝，呢段伯樂與千里馬嘅故事，至今仍為人傳頌。

鍾景輝1937年出生，早年負笈美國，畢業於奧克拉荷瑪浸會大學，之後取得耶魯大學戲劇學院藝術碩士學位。1960年代返港後，將西方正統戲劇理論引入香港，擔任無綫電視藝員訓練班開山祖師，之後出任香港演藝學院戲劇學院創院院長，萬梓良、黃秋生、劉雅麗、蘇玉華等實力派演員，全係佢嘅得意門生。

King Sir舞台劇、電視及電影三棲，成就斐然。佢首倡以廣東話演出西方荒誕劇及百老匯音樂劇，八度榮獲香港舞台劇獎「最佳男主角」、四度獲得「最佳導演」，更獲香港藝術發展局頒發「終身成就獎」。佢晚年喺《甜孫爺爺》、《高朋滿座》等劇集中飾演睿智長者，深入民心，2006年獲TVB頒發「萬千光輝演藝大獎」。亞視經典紀錄片《尋找他鄉的故事》中嘅磁性旁白，更係一代港人嘅集體回憶。

特區政府先後向King Sir頒授銅紫荊星章及銀紫荊星章，多間大學亦先後頒授榮譽博士及院士銜，其履歷更被列入《中國大百科全書》及《世界名人錄》。King Sir離世，香港演藝界痛失巨擘，文化界及觀眾同感惋惜。钟景辉离世