愛回家｜龔水CP上演「世紀龍鬚糖之吻」 張景淳親手拉龍鬚糖 熊家公開招募觀眾意見

《愛．回家之開心速遞》今明兩晚（6月1日及2日）劇情焦點落喺「龔水CP」龔燁（張景淳飾）同熊若水（呂慧儀飾）身上。話說Madam Ceci（林漪娸飾）因為肖像畫被毁，誓要大小姐（林淑敏飾）搵出真兇。大小姐為咗平息事件，決定犧牲龔燁即時炒魷。Ceci仲要趕盡殺絕，搞到龔水無家可歸。龔燁被炒後清閒苦悶，無意中遇到一位龍鬚糖伯伯，被佢嘅專業精神啟發，決心展開第二人生，跟根叔（劉丹飾）學整龍鬚糖。劇中最大亮點係「龔水CP」將會上演甜過龍鬚糖嘅「世紀龍鬚糖之吻」，浪漫又愛意滿瀉。

為咗拍呢場戲，張景淳親身上陣真．拉龍鬚糖，劇組安排專業師傅邊拍邊教。佢笑言「整唔難」，但要「好食就好難」，仲話每拉一嚿麥芽糖磚先整得幾粒，龍鬚糖真係功夫嘢食，每粒都好珍貴。

另外，熊家成員劉丹、呂慧儀、滕麗名、周嘉洛、單立文同張景淳今日喺電視城接受《東張西望》同娛樂新聞台訪問，透露《愛·回家》即將迎來大結局，劇組將會推出多項網上活動與眾同樂，包括徵收網民同粉絲對未來劇情走向嘅意見，以及推出《愛·回家》鐵粉Q&A問答比賽。觀眾由6月5日開始，留意TVB官方社交網同《愛·回家》節目，就會搵到留言機會同參加問答遊戲嘅互動QR Code。

對於編審計劃推出官方版Q&A，一眾演員都好期待，周嘉洛同張景淳被笑指會係最低分玩家，滕麗名爆張景淳冇記性：「佢洗底比較洗得快啲。」呂慧儀仲搞笑話：「可以做問吓金城安到底錫過幾多個人。」TVB

眾人仲大爆角色未來劇情走向，包括被炒嘅龔燁何去何從、安Bon CP同雙大CP（大小姐林淑敏同大家姐滕麗名）嘅發展。滕麗名順勢公開招募虐待大小姐嘅方法：「如果你哋想喺嚟緊劇情裏面睇我點樣虐待大小姐，絕對可以將啲意見寫落TVB官方社交網留言區，我會盡情幫你哋發洩！」佢仲話觀眾最鍾意睇佢哋兩個鬥嚟鬥去、互相廝殺，邊個會贏就睇觀眾喇。

周嘉洛都呼籲網民影響編劇決定：「其實我都知網民有好多都好鍾意安Bon呢個組合，我覺得大家可以反映吓，睇下大家個力去到邊度。」佢更搞笑話：「我係為大家而生架！」呂慧儀就感激編劇團隊：「我哋啲編劇編審好犀利，諗2000幾集出嚟，去到結局篇，可以畀觀眾參與多少少，一齊brainstorm吓。」

昨晚（5月27日）嘅《尋蠢記（上）》就以熊尚善（滕麗名飾）為主角，抽正無綫自家製IP劇《尋秦記》水，獲網民大讚抵死。劇情講述熊家誤墮騙局，熊尚善出手解圍後被金城安用鯪魚誤傷頭部，之後離奇變蠢，冇晒工作能力，連打麻雀都唔識食「九子連環」，引發連番笑話。網民大讚善姐蠢少少好可愛，又期待下集有反轉。明晚（29日）一集繼續以熊尚善為主角，主題係AI，觀眾萬勿錯過。