香港探秘地圖｜潘靜文瞓棺材都唔驚 自爆屋企人做殯儀行業見慣. 藝人潘靜文（Sherman）今日（31日）為劇集《香港探秘地圖》喺尖沙咀做快閃宣傳活動，一改以往青春活潑形象，穿上「小鳳仙裝」現身，連講說話都靜咗唔少。佢接受《香港01》訪問時自爆今次拍劇挑戰人體極限：「我覺得最大挑戰係化大戲妝，然後又要瞓棺材、碌樓梯、化爛面妝，好多新嘗試都喺呢套劇入面發生。」雖然拍攝過程好緊張，但都覺得好興奮。講到著旗袍，佢話當時係自己最瘦時期，所以冇刻意減磅，仲讚導演影得佢好靚。

作為靈異題材，難免要去陰森地方取景。潘靜文憶述其中一幕要深夜去骨灰龕場拍攝，當時佢著全紅旗袍、手執紅色紙油紙傘，場面極度心寒。佢話喺古裝街拍最驚係冇燈嘅時候，真係黑到伸手不見五指。不過佢話因為家人從事殯儀行業，所以對呢啲嘢唔陌生，亦唔會有恐懼：「我對呢一樣嘢就唔係好陌生嘅，亦都唔會話有啲咩恐懼，即係都比較大膽嘅。」佢又話自己「陽氣旺」，今次拍攝冇遇到靈異事件，但之前拍《青春本我》時就不停嘔、頭暈、飆冷汗，感應到有「朋友仔」。為咗令家人安心，佢有聽媽媽吩咐隨身帶平安符傍身。TVB