中年好聲音4｜陳旭培95分奪MVP 科亞高巴被淘汰緣盡16強. 《中年好聲音4》今晚（31日）播映「經典情歌之夜」下半場。許雲妮以獨特沙啞聲線演繹《你怎麼捨得我難過》，唱出屢次被飛嘅感覺，觸動評審。一曲完畢雲妮淚灑舞台，用主持車婉婉嘅衫袖抹眼淚一幕笑翻全場。佢最終斬獲92分成功晉級，周國豐激讚佢係第四季其中一個睇好嘅歌手，張佳添形容演繹「好似睇緊一套戲」，令人意猶未盡。

壓軸登場嘅科亞高巴選唱陳淑樺經典金曲《夢醒時分》，未能發揮最佳水準，被周國豐指「成件事錯晒」，令《夢醒時分》變咗「扎醒時分」。8位選手表現完畢，5位評審商議後，科亞高巴被淘汰，成為《中4》第15名。佢表示好榮幸站上舞台，話《中4》係一個大家庭，多謝其他參賽者指導。賽後科亞高巴話雖然未能晉級，但仍盼望囝囝Jacob以佢為榮：「我會為你而唱，為我們而唱，直到生命的最後一刻。」

至於「靚仔配音員」陳旭培喺上半場獻唱《心酸的情歌》，憑「神之一秒」嘅細節處理豪奪全晚最高95分，成功拿下MVP。得知奪獎一刻，陳旭培激動大嗌「阿媽我得咗喇」，並話會繼續努力，吸取大家意見，繼續唱廣東歌。TVB