劉家聰分享開腦重生路 曾長6cm腦瘤半身不遂 為愛女重新學行.現年48歲嘅劉家聰，曾主持TVB兒童節目《至NET小人類》同《放學ICU》，獲得「家聰哥哥」稱號，陪住無數小朋友成長。早前佢現身《流行都市》分享抗病經歷，透露8年前跑步時身體突然失去平衡，求醫後發現腦內竟然長咗6厘米大嘅腫瘤。開腦手術後留下嚴重後遺症，包括視力模糊、斷片、口齒不清，甚至一度半身不遂，要好似小朋友咁重新學習行路同講嘢，對於曾擔任司儀嘅佢係重大打擊。但佢憑驚人意志逐一戰勝難關，例如向同事求稿苦練發音，克服「黐脷筋」。

劉家聰感激家人支持，令佢知道唔係獨自面對病魔，女兒更成為抗病路上最大動力：「我一定要親眼睇住女兒大學畢業。」康復後佢重投拍攝工作，參與《愛·回家之開心速遞》、《黃金有罪》、《金式森林》、《新聞女王2》等劇集。此外，佢仲自我增值修讀中醫課程，希望以過來人身份，運用中醫知識助己助人。TVB