宋芝齡專訪丨《大長今》改寫人生 從港姐、閒角到商界女強人.今年係宋芝齡入行30周年，佢1996年參選港姐，當年只得17歲。佢形容自己懵懂、老土、唔識打扮，意外入行後卻被嫌演技差，正當萌生退出念頭之際，韓劇《大長今》爆紅，令身為中韓混血兒嘅佢食正韓風，事業成功起飛。宋芝齡甚有生意頭腦，曾開韓語學校，現時仍有經營補習社、移民業務同香薰生意，投資有道被指身家豐厚。2023年曾參选区議會選舉，雖然落敗但仍堅持地區工作。感情方面，佢同安德尊嘅緋聞多年來撲朔迷離，佢今次正式澄清兩人只係同事關係。

【港姐出身做閒角 曾想退出娛圈】

宋芝齡話當年因為同學話「不如去睇明星」，就去咗參加港姐，幸運入到20強。佢記得李珊珊係13號、自己係14號：「我唔識打扮，好多佳麗係美國或外地返嚟，我比較老土，只識泡菜。有次大家話芝士蛋糕好好食，我細個唔知芝士同蛋糕點解會連埋一齊，第一次食覺得味道好神奇。」第一輪就被叮走，烏瀡瀡入行。

拍劇初期多數飾演職員、警察或秘書，朋友都話佢個樣好「豬」。佢坦言愈拍愈沉，心智未成熟，唔識同劇組交接，去到想放棄：「我想去讀書，但媽媽唔放心我一個人去外國，叫我返韓國讀書。請咗幾年假讀書，返嚟又做閒角，我唔係拍劇材料，明明好努力拍喊戲，導演問我點解笑？我知道自己鍾意講嘢，想做司儀又冇機會，所以想做生意。」

【《大長今》改變一生 韓語敬語曾被投訴】

正當宋芝齡想離開TVB，韓劇《大長今》熱播，公司話好需要佢，叫佢唔好走。佢喺韓國已睇過《大長今》，知道幾受歡迎，但估唔到香港會咁爆。之後佢有機會做司儀、主持，去唔同地方採訪韓星，知名度同收入大增。李英愛嚟香港出席活動，更指名搵佢做司儀，佢捉住李英愛隻手話：「托你鴻福，幾好！」之後佢開韓文學校，做好多韓國相關生意，覺得係人生轉捩點。

不過佢亦試過挫敗，因為敬語未夠標準，有次訪問一個大明星，對方板住面投訴佢敬語用得唔好。佢話：「少咗一個yo，佢哋都想殺咗你。我好傷心，之後再雕琢韓文敬語，提高技術。」

宋芝齡運用港韓兩地人脈開創生意，曾成功拎幾個代理返嚟，係第一個引入韓國婚紗攝影嘅香港人，仲獲韓國觀光公社支持。佢打破香港婚攝唔畀底片嘅傳統，做一個套餐。不過後來有韓國人頂爛市，佢學到唔係有質素就得，仲要應付惡性競爭。佢曾同韓國朋友合辦《韓流Times》報紙，又開韓語學校、投資移民生意、韓式小食店、搬運業務，部分已結業。現時仍有經營小學補習學校、專材移民公司及香薰生意。佢話香薰係為減壓，純粹自己鍾意。

【否認與安德尊拍拖：私底下冇聯絡】

宋芝齡同安德尊拍檔主持《都市閒情》及《流行都市》多年，「情侶檔」形象深入民心，有指安德尊曾公開認愛。宋芝齡堅決否認：「公司同事就係公司同事，其實私底下我同佢一向冇乜聯絡，都係返公司見面。佢係一個好好嘅拍檔，我分得好開，談心事、玩，就係另一堆朋友。」

宋芝齡2023年代表自由黨參選灣仔區議員，最終落敗。但佢至今仍堅持做地區工作，話自從做地區工作之後，人生好似充咗電一樣，好滿足。佢總結教育事業、主持工作、地區服務、香薰生意，每一樣都令佢搵到挑戰同滿足感。